Grabitje e armatosur ndaj një banke në Fushë-Kosovë

Para rreth gjysmë orë ka ndodhur një plaçkitje e armatosur ndaj një institucioni mikro-financiar në qytetin e Fushë-Kosovës.

Flora Ahmeti, zëdhënës e Policisë së Kosovës për rajonin e Prishtinës, ka konfirmuar për Koha.net rastin.

“Rreth orës 18:00 kemi pranuar informatën për një grabitje të armatosur e cila ka ndodhur në një institucion mikro-financiar në Fushë-Kosovë”, ka thënë ajo.

Sipas saj, në vendin e ngjarjes kanë dalë menjëherë të gjitha njësitet e nevojshme policore, të cilët po merren me rastin.

Detaje tjera ende nuk dihen.

Kujtojmë se kohëve të fundit, grabitjet e armatosura të bankave në vend janë shpeshtuar. Vetëm pak ditë më parë, në Istog u shënua një rast i këtillë ku, gjatë shkëmbimit të zjarrit mes plaçkitësit dhe policisë, i vrarë mbeti polici Izet Demaj, e po ashtu edhe plaçkitësi./koha.net

Shpërndaje këtë lajm në...